瞓觉发开口梦都识得讲「一日饮8杯水」；事实饮水当然係有益，由唔知几时开始就有「一日饮8杯水」呢个观念，虽然未必话好多人会做得到，不过都有人会坚持尽量做。不过实际上一日饮8杯水係咪可行，而出处有无科学根据？

澳大利亚蒙纳士大学一项有关饮水嘅研究，针对大脑对口渴等感觉及反应，教授Michael Farrell得出结论，一日饮8杯水係毫无根据！Farrell就话人体6成都係水，而好多时候如果唔做运动的话，只有去厕所先会失去水分，根本唔会缺水，而且天气凉爽的话，更加连体液都未必会流。结论係根本无需要饮8杯水，除非你运动量特高，咁就有机会连8杯都唔够。另外一点就係，根据数字，一日大家嘅食物入面，就係有20%係水份，而且好多时大家会饮下其他饮品，其实一样係水份，只不过係有其他物质咁解。Farrell就建议大家唔需要固定咁限自己要饮几多水，只需留意身体提供嘅口渴反应就即刻去饮水。口渴係由于血液变咸，大脑就会发放讯息，令你想饮水。如果你都係无注意到的话，就会开始出现口唇变干、尿液变黄、皮肤有斑点、呼吸急促等，都係身体需要水份嘅表现。所以今日起唔好限制自己「一日8杯水」，係「口渴就即刻饮水」。